أنا فاكر بقة موقف قديم أوي حصلي كنت تقريبا في سنة أولي إعدادي انا كنت في مدرسة إبتدائي خاصة من بتوع العيال الفرافير دول لحد سنة رابعة و بعدين في خامسة حولت علي مدرسة حكومي بتاعة عامة الشعب علشان عمتي هي كانت المديرة بتاعتها واسطة بالبلدي يعني المهم خاصت خامسة إبتدائي و جبت مجموع مش عالي يخليني أعرف أنقل علي مدرسة جمب البيت خصوصا إن مدرسة عمتي دي كانت بعيدة عن بيتنا فبالتالي جيه الربط بتاع مدرستي علي مدرسة في نفس المنطقة و كانت مدرسة ما يعلم بيها إلا ربنا سمعتها زفت و كلها عيال صيع من اللي بيشيلوا الكاتر في جيوبهم و بيشربوا سجاير مع أنهم لسه عيال بس لزوم الصياعة دخلت المدرسة و كان بس لمدة مؤقتة لحد ما بابا ينقلني مدرسة تانية أحسن عن طريق عمتي كوسة برضه قضيت في المدرسة دي أسبوع شفت فيها كائنات غريبة و عيال كان اول مرة اشوفهم في حياتي خصوصا زي ما قلتلكم قبل كدة كنت طفل فرفور من مدرسة خاصة لمدرسة عمتو تخيلوا بقة الصدمة  و كان العيال بصراحة فظاع كل يوم خناقات و سب و ضرب و طبعا انا ماليش في الليلة دي خالص كنت لسة في مرحلة البراءة و كانوا بيجيبوا معاهم سردين و رنجة و فسيخ يفطروا بيهم تخيلوا مكانتش مدرسة كانت غرزة بالبلدي و سجاير في الحمامات و المدرسين بيضربوا من الطلاب و عيال شحطه و لسه فس 3 إعدادي دوول بقة فتوات المدرسة الناظر بقة أو المدير مش فاكر بالضبط كان عامل زي المعلمين تجار المخدرات بالضبط  المهم نيجي للحادثة اللي حصلتلي في المدرسة دي بقة كان في حصة ألعاب أو تسمي العاب و كان في ماتش كورة أو بمعني أصح خناقة بالبواني و التلطيش علشان الكورة بين الفريقين و إحنا كنا قاعدين علي أطراف الملعب علي حاجة زي الرصيف و بنتفرج فجأة لقينا واحد مش عارف مين بس شكله مدرس او حاجة بيجري و معاه خرزانة طويلة منظرها يوقع القلب في الرجل من غير حاجة و بيجري و هاتك يا ضرب في رجلين العيال اللي قاعدين علشان يرفعوها من ارض الملعب علشان الفريقين يعرفوا يلعبوا براحتهم !  المهم أخدت انا واحدة علي رجلي و مقلوكومشي بقة علي اللي حصلي بعدها رجلي إحمرت و إزرقت و ورمت بشكل مخيف و انا مش قادر أدوس عليها و عمال أعيط زي البنات و كانت حالتي كرب و قلت بيني و بين نفسي علي جثتي لو كملت في المدرسة دي حتي لو حسيب التعليم و أسرح بعربية بطاطا أكرملي رجعت البيت و كحيتلهم و وريتهم رجاي أمي كانت حتروح فيها لما شافت الكدمة و راسها و ألف سيف تخرب بيتهم و تودي الراجل اللي ضربني في داهية المشكلة إني ماكونتش أعرف مين اللي ضربني و معرفشي بيشتغل إيه أساسا كل اللي فاكره إنه كان بنظارة كبيرة عاملة زي نظارات البحر يدوبك كان فاضله النفاسه و تبقي نظارة بحر بجد المهم بابا جيه معايا المدرسة تاني يوم و ناوي علي الشر و انا كمان كنت متنرفز أوي و واخد بقة معايا بابا مش أي حاجة محدش حيعرف يعملي حاجة و هو معايا بقة حماية رحت و دخلنا للمدير و كان قاعد علي مكتبة و شكله راجل محترم عادي و راح بابا إشتكاله و وريته التعويرة و بابا كان متنرفز جدا و قعد يشتم في اللي ضربني و أنه معندوش قلب ولا عنده ضمير و أكيد معندوش عيال علشان لو كان عنده اكيد مش حيقدر يعمل كدة في عيل صغير و الراجل عمال يهدي في بابا و يقوله معلشي قولي بس هو مين و انا اوريلك حعكل فيه إيه و حجيبلك حقك و متزعلشي و حجازيه و كدة طبعا بابا ميعرفشي هو مين ولا إسمه إيه ولا انا بس فبابا قاله انا معرفشي أسمه بس احمد بيقول إنه عارف شكله كويس و حيعرفة لو شافه فالمدير سألني هو بيشتغل مدرس إيه قلتله معرفشي قالي طب شكله إيه قلته لابس نظارة كبيرة سوداء قصدي طبعا نظارة شمس لأن اللي كان ضربني كان لابس نظارة شمس سوداء كبيرة قالي طيب تعالوا معايا حاخودكم أوضة المدرسين و تشاورلي بس عليه و انا حجيبلك حقك قلناله اوكي و قمنا معاه علشان نروح اوضة المدرسين اللي في المبني التاني و قبل ما نمشي من المكتب راح فاتح المدير الدرج و طلع مفاتيحه و نظارة الشمس بتاعته علشان الجو شمس أوي في الحوش و نزل معانا و اول ما طلعنا بره المبني راح لابس نظارة الشمس و كانت الصدمة !!!! بابا  بابا بابااااااااااااااا إيه !!!!؟ هو ده الراجل اللي ضربني !!!!!!
__________________
الشوارع حواديت
حودايه الحب فيها
و حودايه ... عفاريت !!!
أحمد مصطفي |