نشر بجريدة الدستور يوم 20 إبريل 2009 في مقالة لأحمد فؤاد نجم قصيدة جميلة جدا أول مرة أفرأها له تحكي عن الوضع الحالي والماضي والمستقبلي بيننا و بين الطبقة ( اللا راقية )
يا ريت يعجبكم و بقى قولوا رأيكم فيها............
هما مين وإحنا مين .. ؟
هما الأمرا والسلاطين ..
هما المال والحكم معاهم ..
وإحنا الفقرا المحرومين
حزر فزر شغل مُخك
شوف مين فينا بيحكم مين ؟
..........................
إحنا مين وهما مين .. ؟
إحنا الفُعلا البنايين
إحنا السنة وإحنا الفرض
إحنا الناس بالطول والعرض
من عافيتنا تقوم الأرض ..
وعرقنا يخضّر بساتين
حرز فزر شغّل مُخك
شوف مين فينا بيخدم مين .. ؟
..........................
هما مين وإحنا مين .. ؟
هما الأمرا والسلاطين ..
هما الفيلا والعربية
والنساوين المتنقية
حيوانات استهلاكية
شغلتهم حشو المصارين
حزر فزر شغل مُخك
شوف مين فينا بياكل مين .. ؟
..........................
إحنا مين وهما مين .. ؟
إحنا قرنفل على ياسمين
إحنا الحرب : حطبها ونارها
وإحنا الجيش اللي حرّرها
وإحنا الشهدا بكل مدارها
منكسرين أو منتصرين
حزر فزر شغل مُخك
شوف مين فينا بيقتل مين .. ؟
..........................
هما مين وإحنا مين .. ؟
هما الأمرا والسلاطين ..
هما مناظر بالمزيكا والزفة وشغل البوليتيكا
ودماغهم طبعاً أستيكا
بس البركة بالميادين
حزر فزر شغل مُخك
شوف مين فينا بيخدع مين .. ؟
..........................
هما مين وإحنا مين .. ؟
هما الأمرا والسلاطين ..
هما بيلبسوا آخر موضة
وإحنا بنسكن سبعة في أوضة
هما بياكلوا حمام وفراخ
وإحنا الفول دوخنا وداخ
هما بيمشوا بطيارات
وإحنا نموت بالأوتوبيسات
هما حياتهم بامبي جميلة
هما فصيلة وإحنا فصيلة
حادي بادي يا عبدالهادي
ياللي عليك قصد الغنوا دي
لما الشعب يقوم وينادي
يا إحنا يا هما في الدنيا دي
حزر فزر .. شغل مُخك
شوف مين فينا حيغلب مين ؟؟؟؟؟؟ .gif "(252)")