نقابة الرؤساء...!!! - منتديات عبدالرحمن يوسف-منتديات أدبية شعر أدب ثقافة تعليم سياسة اخبار

أحمد فيصل · 18-09-2005, 02:07 am

نقابة الرؤساء...!!!

شوهد هذا الإعلان معلقا فوق أحد الحوائط:

اقتباس:

Job Opportunity

مطلوب فورا وبأجر مجزي

تعلن دولة روبابيكيا عن حاجتها إلى كادر متميز لشغل الوظيفة التالية:

رئيس جمهورية

على أن تتوافر في المتقدم الشروط التالية:

1- أن يبلغ من العمر 70 (سبعين) سنة ميلادية على الأقل.

2- أن يكون حاصلا على رتبة عسكرية لا تقل عن لواء.

3- خبرة 20 سنة على الأقل في نفس الوظيفة.

4- أن يكون رئيسا لحزب (المستقلون يمتنعون)

وتقدم الطلبات بواسطة وكيل المتقدم في خلال 12 ساعة من الآن....

نظر الجميع مذهولين إلى ذلك الوجه المألوف الذي اقتحم عليهم منى القابة غاضبا ملوحا بورقة...

- قريتوا الهبل اللى مكتوب ف الورقة دي...؟!

- مالك يا رئيس 1..؟!

- إقروا.. إقروا بنفسكم..!!

تناول رئيس 2 الورقة فألقى على أسماع الحضور ما قرأناه على الحائط منذ لحظات...

رئيس 1: سمعتوا..؟ سمعتوا بنفسكم؟! إحنا بنتقرطس.. بنتقنطر واحنا قاعدين.!! أنا باطالب باجتماع مجلس نقابة حالا...

بعد أخذ الأصوات - إجماع- بدأ الاجتماع..

رئيس 3: أيها السادة الرؤساء.. مازالت حكومة روبابيكيا تصر على تجاهل وتخطي سلطات وحقوق نقابة الرؤساء، ناسية في ذلك - أو متناسية- دور نقابة الرؤساء التاريخي في الدفاع عن مصالح الوطن...

رئيس 1- يقاطعه-: بدون خطب ولا مرافعات وحياتك، إنس مرة انك كنت محامى...

رئيس 3: م الآخر كده عشان ما نزعلش الزميل، فيه تجاهل وتطاول سافر حصل علىأشخاصنا، ممكن أسمع أقتراحاتكم..؟

رئيس 2: أنا أقترح إننا ننتخب واحد منا يتقدم للترشيح..

رئيس 4: أنا باعترض..!

رئيس 5: الكلام ده ما ينفعش.. يعني إيه واحد من نقابة الرؤساء يرشح نفسه كده..؟ احنا بنعين الرؤساء مش بنقدم طلب للبهوات ونحط إيدينا على خدنا..

رئيس 3: لو سمحت صلح كلامك يا رئيس 2...

رئيس 4: أنا باعترض..!

رئيس 2: مفيش مشاكل.. إحنا ننتخب واحد يتعين رئيس..!

رئيس 1: أهو كده..!

رئيس 4: أنا باعترض...

رئيس 5: أنا باقترح إن الانتخابات تكون بالاقتراع السري المباشر.. في صناديق خشب..!

رئيس 6: ويرأس لجنة الانتخابات أكبر أعضاء النقابة سنا...

رئيس 5: رئيس 1...؟!!! على جثتي..!!

رئيس 4: أنا باعترض..!

رئيس 1: ليه بس كده يا كابتن...

رئيس 5: انتوا ناسيين عمل ايه ف الانتخابات بتاعتهم..؟ عمل بطاقات ترشيح متعلم فيها على اسمه.. وكمان غير نص الصناديق بعد ما خرجت م اللجان..!!

رئيس 2: طب إيه رأيكم في رئيس 5..؟!

رئيس 6: أما هذا فدونه ضرب الرقاب..!!

رئيس 3: وضح أسبابك لو سمحت..

رئيس 6: في الانتخابات بتاعته خلى البلطجية بتوعه يقطعوا يفط المرشحين.. ويضربوا أنصارهم.. وخلى الأمن بتاعه يلفق تهم لنصهم على الأقل.. واحد زي ده ممكن يعمل إيه فينا..؟!

رئيس 4: أنا باعترض..!

رئيس 3: ماشي يا 6.. بلاش رئيس 5..

قال رئيس 6 وكأنما يلقي قنبلة: طب ليه ما يكونش رئيس 3..؟!

تعالت الأصوات: أيوه.. نعم.. رئيس 3 هو الأفضل.. رئيس 3 أحسن واحد..

وهنا صرخ رئيس 4 متشنجا ومرتميا على الأرض:

لأ.. لأ.. لأ.. أنا.. أنا باعترض.. باعترض.. باعـ ــعترررض..!!!!!!

هنا حدثت حالة من الهرج والفوضى في القاعة لم تنته إلا بتدخل رئيس 6 - الذي كان موجها لمادة الرياضيات ثم وزيرا للصحة قبل توليه الرئاسة - وعاجل رئيس 4 بضربه بحقنة مورفين...

رئيس 1: أنا عايز افهم بقه.. أنت قاعد تعترض م الصبح واحنا مطنشينك وانت عادي.. اشمعنى يعني لما جت سيرة رئيس 3 اتهبلت بالشكل ده...؟!

رئيس 4 - وهو شبه غائب عن الوعي من أثر المورفين-: أنا فهمت من كلامكم ان كلكم مع الرئيس 3..

الجميع: أيوه.. فعلا .. نعم..

رئيس 4: يعني أقدر أقول كده إنه لما تتعمل الانتخابات فانتوا غالبا ح ترشحوه..

رئيس 5 - بغضب- : تعينوه...!!

رئيس 4: ماشي تعينوه.. صح..؟!

الجميع: صح...

رئيس 4: أنا باعترض..

الجميع : ليه..؟!

- ده آخر واحد ينفع رئيس دولة.. أنتوا ناسيين قال إيه..؟

الجميع: إيه.. هه هه..؟ إيه..؟

رئيس 4: قال ممكن أسمع أقتراحاتكم..؟!!!!!!!

شاعر البيداء · 19-09-2005, 11:36 pm

لو أن هذه إحدى مفاجآتك يا سيدي التي كنت تدخرها فهي أفضل مفاجأة تفاجئنا بها

معذرة لم أنتبه لها لأني لا أدخل منتدى النكت كثيرا ، لذا أوصي بنقلها لمنتدى القصة
إنها قنبلة يا أستاذ أحمد ، رائعة رائعة رائعة ، من ناحية الأسلوب ومن ناحية الفكرة ومن ناحية المعالجة الدرامية ، عمل متكامل جميل ، يذكرني بقصص الراحل العظيم الدكتور يوسف عز الدين عيسى ، التي تحوي شيئا من الفانتازيا ، مش عارف بتضن علينا ليه بأعمالك وهي بهذه القوة والروعة ، أنا ما زلت منتظرا بقية أعمالك خاصة مجموعة الخوف والبرد

mrmr · 20-09-2005, 01:33 am

جامـــــــــــــــــــــــــده جدا" يا احمد

بجد في عصرنا ده سبب كافي جدا" علشان الواحد مش ينفع يبقي رئيس

ازاي يعني يبقي ديمقراطي

انت عايز الشعب يتجرأ علينا ولا ايه يا احمد

واقع .. ساخر ... مرير

لكن واقع .. وعيشينه

شكرا يا احمد علي التحفه دي

بس يا ريت تقوللي دي بتاعتك و لا انت نقلها

اصل الموضوع ده يقرق .. هو مش هايفرق كتير يعني

شكرا" مره تانيه يا احمد

سلام

ريشة · 20-09-2005, 10:41 pm

إيييه ده كله إيه ده كله!!
قصة متكاملة قصيرة موجزة معجزة مباشرة خبيثة نميسة لذيذة!!
وبعد ده كله
واقعية حقيقية صادقة لأبعد الحدود
لدرجة إني بعثتهم يسألوا عن اللي كتب الإعلان ده يمكن ألحق قبل ما ال12 ساعة يعدوا قالولي ما تنفعيش لأنك دكتورة مش لواء!!
كمل يا روميل وورينا إبداعاتك

أبو القاسم · 21-09-2005, 10:29 pm

قصة رائعة ومعبرة يا أستاذ أحمد
ولكن ألا ترى معي أن هناك تناقض ما في سلوك أعضاء نقابة الرؤساء بحيث أنهم يرفضون من يزور الانتخابات ويسلط البلطجية والأمن على الناخبين والمرشحين.. ويقبلون رئيس 3 لأنه ديمقراطي.. ثم يتراجعون -كما يبدو من بين السطور - عن قبولهم هذا بعدما يلفت رئيس 4 نظرهم أنه ديمقراطي..!!
لا أعتقد أن سؤالي قد خفي على ذكائك..! مع من يقف رؤساؤك بالضبط..؟ مع الديمقراطي أم ضده؟ ومع المزور والبلطجي أم ضدهما؟!
قل لي أنت لأني حاولت الاستنتاج وفشلت، وهذا سبب تأخري في الرد عليك..

(((في حفظ الله)))

أحمد فيصل · 22-09-2005, 04:18 am

طبعا..! أخجلتم تواضعنا لوحدها ما تكفيش لوصف اللي عمله هذا الكلام اللي قريته في تواضعنا..
عزيزي شاعر البيداء: كالعادة بتوصف شعورك بدون مبالغة.. لكن شعورك نفسه مبالغ فيه..! كلمة يوسف عز الدين عيسى دي مش اسم علم مفرد.. دي قطر عدى عليا خمس ست مرات رايح جاى..! فكرتني لما باشوف حفلة فيها صوت كده على قده وتقوم مغنية لصباح مثلا.. فاروح أنا قايل: آه ه.. رمت نفسها قدام القطر..!!
إنما تصدق اني كتبتها ف نص ساعة قبل ما انشرها على طول..؟! يعني ببساطة ساعة ما وعدتك بمفاجآتي كانت القصة دي لسه ف علم الغيب..!!
الخوف والبرد وريحة السجاير لسه عليها شوية.. ما كتبتش منها إلا القصة الأولى والتالتة والرابعة اللي نشرتها.. التالتة نشرتها في موقع الصفوة ولابقت موجودة هيه ولا الموقع نفسه...بس أصلها لسه عندي ما تقلقش

أحمد فيصل · 22-09-2005, 04:38 am

اقتباس:

بس يا ريت تقوللي دي بتاعتك و لا انت نقلها

اصل الموضوع ده يقرق .. هو مش هايفرق كتير يعني

يا ساااتر.. انتي ما بتنسيش حاجة أبدا..؟! لأ يا ستي بتاعتي.. بالنسبة للإعلان أنا عامل له اقتباس عشان يبقى متبروز مش أكتر....
بس برضو وجودك في مواضيعي بينورها.. يكفي إن أي حد يشوف اسمك على الرئيسية يدخل الموضوع عشان يعرف مرمر بتقول إيه....
حاجة بقه باقولها لشاعر البيداء وياريت تبقي حاضرانا..

اقتباس:

معذرة لم أنتبه لها لأني لا أدخل منتدى النكت كثيرا ، لذا أوصي بنقلها لمنتدى القصة

أنا بقى مش فاهم إيه العيب في منتدى النكت؟؟ ده اسمهمنتدى الفكاهه والمرح.. وفيه قسمين نصوص ساخرة ونكت..
وانا لاحظت ان القصة قعدت بتاع 3 ايام لحد ما حد رد عليها.. ولا حد رد عليها ولا كتب غيرها.. فده خلاني أحكم إن فيه "إزورار" أو إحجام عن المشاركة ف المنتدى ده..
ليه..؟! هو احنا بقينا بنخاف نضحك..؟! وللا عاجبانا حياتنا قوي بحيث ما نحتاجش حاجة تضحكنا..؟!
لهذا زي ما قلت قبل كده ح احط إيدي ف إيد مرمر وأوسكار وتوت عشان نقلب كيان منتدى الفكاهة كله.. بس على الله يسدوا..
يا ريت بقه الدكتورة ريشة وابو القاسم يستنوا عليا لحد بكرة لأني مروح دلوقت..

شاعر البيداء · 22-09-2005, 08:47 pm

يا عم أحمد بالراحة علينا ، احنا لا بنخاف من الضحك ولا بنكره الضحك ، كل الحكاية انا قلت ما بدخلش كتير مش بنفي الدخول تماما بدليل انا ليه بعض التعليقات هي صحيح نادرة بس موجودة ، لأن بتبقى فيه أولويات بقرأ اللي في المنتديات التانية الأول وإذا تفضل جزء من الوقت بدخل منتدى النكت ، ولكن إذا كانت دي على العجالة فما بالك بالبقية ، صدقني أنا لا أبالغ إطلاقا وإذا لم تعجبني كنت انتقدتها كما أفعل دائما ،
وبعدين عرفت قيمتي أول ما علقت عليها توافد الأعضاء على قراءتها والتعليق عليها ، شوفت بقى أنا انا شخص جذاب ، بالجيم مش بالكاف

سامية أبو زيد · 14-05-2006, 04:30 am

تحياتى يا أستااااااااااااااااااااااااااااااااااذ
يا كبيييييييييييييييييييير
حقيقى أنا عاجزة عن التعليق . عفارم .

أحمد فيصل · 20-05-2006, 02:47 pm

تحياتي يا أستاذة يا كبيرة...
ودمت لي قارئة...