مشاركتي الاولى ( في الاخر دودة )

يوسف العصفور · 24-12-2004, 05:04 pm

في الآخر دودة
- اسكتي يا دودي إنما أنا إمبارح وقعت حتت وقعه من على فرع شجرة البرتقانه اللي جنب شجرة التوت بتاعت خالتي ممدودة.
- وانتي ايه اللي وداكي هناك هو عصعص ابن خالتك جيه
- لا... بس خالتي كانت عايزاني اساعدها.... وبعدين شميت ريحة البرتقان جننتني قلت اكيد طعم ورقه زي ريحته بس يا خسارة ماكنش .
- انتي برضو اكلتي من ورق البرتقان
- اه تصدقي انا ضيعت اكلتي بتاعت النهاردة على ورق البرتقان وياريت كان طعمها حلو ده حتى صغير....... بس تعرفي ريحته حلوة اوي .
- استفدتي ايه يا فالحة لما وقعتي مش كان ضهرك حاينكسر
- اه متفكرنيش يا دودي .. يالله حصل خير الحمد لله بس والله ماكنش ذنبي انما لولا حبت الهوا ماكنتش وقعت .
- طب خلي بالك يا فالحة مش كل مرة تسلم الجرة
- طب اسيبك بقى علشان انا النهارة رايحة لفرع شجرة لوز ضلل جنب بتنا وعايزه اجرب طعم ورقه
- تاني يا ممطوطة هو انتي مش بتقولي ان مفيش احلى من ورقة التوت اللي بناكله
- لحد دلوقت اه بس انا ماجربتش كل الاوراق وبعدين انا زهقت وماعنديش صبر على نوع ورق واحد ....تعرفي انا ساعات بحس ان جوايا حاجة يتزوقني زق اني اغير خصوصا لما اعرف اني في حوالينا شجرة جديدة ممكن اوقها .
- بس على الاقل بتضيعي اكلتك كل يوم على ورقة شكل ومش بتاكلي ورق توت .
- لا مانا مش كل يوم احب اغير تعري حتىىاليوم اللي انا برجع اكل توت بيبقى واحشني جدا خصوصا انوو لحد دلوقت احلى طعم ورق شجر .. انتي ممكن تيجي معايا المرة اللي جايه وتجربي .
- لا يا ستي انا بحب التوت ومش باحب اغير وبعدين انا ماستحملش وقعات الشجر والحاجات اللي بتحصلك .
- براحتك
................................
- افتحي بسرعة يا ماما ....يا ماما افتحي بسرعة .
- في ايه يا ممطوطة الباب مفتوح ادخلي ........... مالك بتنهجي كده وجايه صوتك عالي .
- اصل انا روحت عند غصن اللوز اللي ضلل علينا علشان اكل حاجة جديدة سمعت عنها انها طعمه حلو .
- وبعدين يا مغلباني .
- استنيت لحد ماخلصت شغل وجيه معاد الغدا وابتديت اتحرك على الغصن بتاع طنت ممدودة وسلمتلك عليها ورحت عند السوق وبعدين شمال عند خالتي ام عصعوص .
- ها خلصي انا مش فاضيالك .
- بس لحد ما وصلت عند الغصن قعدت اشم الورق مالقتش ريحتها حلوة بس طعمها مش بطال بس جديد فيه مزازة ... المهم ابتديت اكل .... اكل مافيش قطمتين لقيت الشجرة بتتهز جامد والغصن اللي انا واقفه عليه بيروح يمين وشمال ويبعد عن شجرتنا ويقرب ولقيت ايد كبيرة جايه عليا وقعدت اجري اجري لحد ماقربت من غصننا رحت نطه عليه الحمد لله لقيت نفسي في حوش المدرسة يااااااااااااه لولا كده كنت حاتخطف .
- وبعدين معاكي انت شاكلك مش حاتجبيها البر ربنا يستر ... يالله قومي رتبي القاعدة وتعالي نقعد مع ابوكي ........
- لا انا تعبانه اوي وعايزه انام .
- اكيد علشان تنطيط طول اليوم .

..................................
- ممطوطة ايه ده انت ايه اللي مصحيكي .
- جعانه اوي يا ماما لدرجة اني لقيت نفسي هنا من غير ماحس .
- تقومي تاكلي المخزون
- لا والله مش كله
- مش كله امال ايه ده كله بكرة الصبح تقومي من النجمه تكمليه . فاهمه
- عنيه .
- لما نشوف
- لا انت عارفه بنتك .
.................................
الحقوني بتخنق اهو ووو اهوووووو يا ناس يا ظلمة في حد يرش السم ده على الشجر ........... الحقوني ...........الحقوني اهووووو اهووووو.
..........................
- اما انا يا دودي كنت حاتخنق واموت بجد النهاردة .
- دي كانت شجرة ايه المرة دي .
- شجرة كافور كبيرة يادوب لسه باكل ومتمزكه فجاه كده مقدرتش اتنفس ولقيت في سحابه سودا اوي مغطيه السما ومحاوطاني وقعدت أكح وأكح ولولا اني ادحرجت من على الغصن ووقعت كنت فعلا رحت فيها .
- وماخفتيش تقعي تنكسر رقبتك .
- انا عاندي رقبتي تنكسر ولا اني اموت مخنوقه .
- طب وبعين معاكي انت مش حاتتلمي بقى وتشوفيلك عريس يلمك ... احنا معدنا قرب اوي .
- اه صحيح احنا معادنا قرب وانا عايزة اقعد شوية فيه ورق جديد سمعت عنه عايزه ادوقوا .
- يا بنتي انت لازم تتجوزي قبل مايجي الشتا واحنا خلاص قربنا اهو انا مش عاوزاكي تتاخري اكتر من كده .
- لا ولا يهمك اتاخرت ماتخرتش رايحين رايحين .
- بس نروح واحنا شايلين اولادنا اللي حايكملوا المسيرة ويشيلوا اسامينا احسن مانروح فاضيين ويادوب نبقى فراشات كام يوم وننتهي خالص ونتنسي .وماحدش لا يبكي علينا ولا يفتكرنا .
- تعرفي كلامك في كتير منه صح وهوه ده الموضوع اللي شاغل دماغي اليومين دول اوي .
- موضوع ايه.
- ازاي ابقى موجوة على طول حتى بعد ما أموت .
- مانا قلتلك بالخلفة .
- لا انتي قلتي اسمي بالخلفة انما انا عايزة انا اللي اكون موجودة مش اسمي بس .
- انت سمعتي عن فراشة مامتتش .
- لا عمري
- خلاص عايزه ايه انا مش فاهمه حاجة .
- ولا انا .... بس زي ماقلتلك عايزة على طول اكون موجودة حتى بعد ما اموت .
- طب اتفردي اتفردي في شوية دودات عواجيز جايين خلى واحدة تشوفنا يمكن نعجبهم ويجوزونا من ولادهم خلينا نخلص بقى .
- ماشي يا ستى اهو اهو .. كمان ... ولا كده حلو .
.............................
- يالله يا ممطوطة جهزتي كل حاجة انتي اتاخرتي .
- اه
- جهزتي كل حاجة ....خدتي مجمع التسابيح - ايوه اول حاجة -واكلتي كويس - ايوه .... هو انا ممكن اتاخر شوية كمان .
- ممطوطة انتي ماشفتيش نفسك امبارح ولا انت كنت نايمة وبتحلمي .
لا ايه االي حصل - بطلى خباثة انتي صحيتي فجاة كده وكنتي عايزة تروحي الخلوة من ورانا من غير مانودعك .
لا والله ابدا انا كنت عايزة اتفرج واطمن ان كل حاجة جاهزة .... اه اهه اهه انا باين خلاص كده سلاااااااااااااام اشوفكم بعدين .

..........................
آآأأأه .... يآأههههههه
- يا ه انا نمت كتير اوي ....ايه ده كل ده حرير ........ كتير اوي ورحته حلوة كه ليه ... انا لو اعرف انه ريحته حتبقى حلوة كنت نمت من زمان ...ياه الجناح بيكون طويل كده اه اها اتفرد بقى ...الجو جميل اوي .
- ممطوطة حمدلله على السلامة اخيرا .
- ازيك وازاي الباقي كلهم .
- تمام - كلوا صحي .
- اه ماعدا اتنين ثلاتة كده من الشجرة الي جنبنا
- يا حرام ربنا يقوي اهاليهم .
- اهلان يا ممطوطة
- مين عصعص ازيك سمنت شوية بعد الخلوة
- ا ه انا كنت خايف اوي بس كويس امال فين جوزك
- مش عارفه بس شاكله لسه ماصحيش مانت عارفه بيموت في النوم
- لا صحي بس بياكل عند جنينة الورد اللي في اخر الممر
- اه طيب يا نايم يا بياكل
- ايه اللي انت خدتيه من اكل شجر تاني والمغامرات اللي عملتيها وكام مرة اللي انت كنت حاتموتي فيهم
- لا اخدت كتير
- شوفي الالوان بتاعت كل فراشة حواليكي واحدة ويمكن نفس النقشة تقريبا انما انا بصي على جناحاتي اللون البرتقالي ده من شجرة البرتقان والاصفر ده من الجوافة والاحمر ده من شجرة الطماطم والتجزيعة البني دي من شجرة اللوز والريحة يا سيدي على الريحة انتي مش شمه ولا ايه ؟
- لا شمه بس افتكرت ان دي ريحة الجنينه اللي حوالينا
- لا الريحة دي من شجرة الياسمينه اللي كانت جنب بيت جوز عمك الكبير
- يا سلام علشان شوية اللوان وريحة حلوة استحمل اللي كان بيحصلك والتاخير اللي انت اتاخرتيه دانت اخر واحدة صحيتي وبعدين حاتفرق في ايه احلى واحدة او احلى ريحة ماحنا كلنا كلها يوم ونخلف ونتنسي وولادنا هما اللي يكملوا .
- مش عارفه بس انا كده مبسوطة ولعلمك انا ماعنديش مانع ولادي هما اللي يكملوا المسيرة بس انا على الاقل حاحكلهم حاجات كتير جديدة وحلوة وعلشان كده اللي حايطلع منهم حايحبني اوي وحافيدو اكتر .... بس بجد مش انا لو كنت عارفه اني حاكون بالحلاوة دي مش كنت اتجوزت واحد احلى شوية .
- عايزة الحق
- اه
- انا لو من جوزك وكنت باشوف اللي انت بتعمليه ده ماكنتش اتجوزتك
- لعلمك ده رأي برضو بس هو واحد طيب وجميل أوي .

..............................
- نادر .... نادر تعالى بسرعة بص على الفراشة دي
- يااااه دي جميلة اوي والوانها مختلفة تعالي نمسكها ونوديها للمعمل للدكتور عزت
..................
- دي فراشة بلدي زي اللي حواليها بس الوانها دي جديدة وجميلة وغريبة في نفس الوقت بصوا اهتموا بيها لحد ماتفقس بيضها و بعد ين حطوها نعمل عليها شوية ابحاث وبعدين نضمها لمجموعة المتحف النادرة

nesma · 25-12-2004, 08:11 am

حلوة أوي القصة يا أستاذ يوسف

ومعانيها جميلة جدًا بجد ..

بس أنا في الأول مش كنت عارفا معني كلمة (ممطوطة) بس فهمت انو اسم الدودة

النهاية وحدة في الآخر ..

لكن اللي تعب واتميز بيكون ليه تعامل خاص ..

كل حاجة في الدنيا سناريو واحد

ربنا يرحمنا

تسلم بجد على الروعة دي ومنتظرين على شوق بقية الحكايات

ahemed · 27-12-2004, 10:22 pm

يا جماعة . . .
موضوع الدودة دا جامد أوي . . .
إيه الدماغ دي يا عم يوسف يا عصفور . . . ؟ ؟ ؟ ؟
شكلك كدا فلاح عايش وسط الغيطان . . . أو نفسك تعيش وسط الغيطان زي حالاتي . . .
أنا فعلا أحييك . . .