نكت مصرية .. - منتديات عبدالرحمن يوسف-منتديات أدبية شعر أدب ثقافة تعليم سياسة اخبار

أوسكار · 10-12-2005, 03:05 am

بصوا بقى انا تعبت بصراحة وعايز أعيش بعيد عن الرومانسية شوية .

فقولت أكتب نكت.. يامُسهل يارب :

واحد سكران كان بيعاكس وحدة وحشة اوي بالليل فكان بيقول لها يا وحشة يا وحشة راحت ملتفتة ليه وقالت له يا سكران راح قايل لها طب انا سكران حفوق بكرة .. وانتي ..........

************************

مره واحد مسطول اوى راجع بيتهم الساعه اتنين بليل فاخته فتحت له الباب قام ضربها بالقلم على وشها طاخ وقالها كنتى فين لحد دلوقتى.

*************************

اتنين مساجين اتفقوا يكسروا باب السجن ويقتلوا الحارس ويهربوا. كسروا باب السجن ملقوش الحارس قعدوا يستنوه

***********************

محشش قالوا له قول لنا طير بحرف الكاف قالهم كنتاكي

************************

واحد غبي وقع في حفرة ومش عارف يخرج منها، اول مرة حاول يخرج معرفش، تاني مرة حاول يخرج معرفش برضه، تالت مرة قال لو معرفتش اخرج المرة دي هروح

*************************

واحد مسطول ماشى فى الشارع لقى عمود نور مكتوب عليه شقة للايجار راح قعد يخبط على العمود لغاية لما جاله مسطول تانى قال له انت بتعمل ايه هنا قال له اصلى لقيت مكتوب شقة للايجار قمت قعدت اخبط بس محدش رد عليا قام التانى قال له غريبة مع ان الجماعة منورين النور فوق .

***************************

واحد بلدياتنا عنده صداع راح للدكتور قاله يادكتور انا عندى صداع قاله انت بتنام وبتسيب

الشباك مقفول ولا مفتوح قاله مقفول . قال له افتحه تانى يوم راح له قاله الصداع راح

قاله الصداع راح والتلاجة راحت والغسالة راحت والبوتجاز راح ..........

تحياتى لكم .

ZeFT_awy · 10-12-2005, 03:35 am

حلوة يا اوسكار وخصوصا بتاعة العمود

اقتباس:

واحد مسطول ماشى فى الشارع لقى عمود نور مكتوب عليه شقة للايجار راح قعد يخبط على العمود لغاية لما جاله مسطول تانى قال له انت بتعمل ايه هنا قال له اصلى لقيت مكتوب شقة للايجار قمت قعدت اخبط بس محدش رد عليا قام التانى قال له غريبة مع ان الجماعة منورين النور فوق

المسطول ما يعرفش ان الجماعة ناموا وسابوا النور والع