مغامراتى اليوميه مع رويتر نبويه ـ الحلقه 1 ـ همه حضروا أمتى

shady30 · 03-09-2006, 06:20 pm

مقدمه لمغامراتى اليوميه مع رويتر نبويه

سأروى لكم مغامراتى اليوميه مع جارتى نبويه الشهيره بنبويه رويتر واكتسبت هذا الأسم من كثرة نقلها للأ نباء والأخبار ليل ونهار عن كل فرد فى الحاره و اللى اتجوزت واللى أطلقت والعيان واللى اتغنى واللى فلس .. كل .. كل حاجه عارفاها ومتبعاها لحظه بلحظه بالأضافه إلى التعليق عليها با لأمثال الشعبيه بخبرتها الثقافيه التى أستمدتها من أحداث الحياه وليس من الكتب. أ سكن أنا ونبويه فى عماره واحده قايله للسقوط فى احدى حارات مصر. وأنا ونبويه معتادين ان نرى بعضنا يوميا رغم أن العلاقه بيننا هى علاقه القط با لفار دائما فيها جرى وشد وجذب ولكن كل منا لايستطيع الأستغناء عن ا لأخر ويفتقد الأخر إذا غاب ويحن اليه. فأ نا رجل مثقف أو مسقف على رأى الست نبويه أحب مطالعة الكتب والصحف ولى وجهة نظرى الخاصه ورؤيتى للأشياء أما ا لست نبويه فلها طريقه أخرى فى التعبير عن رأيها وتحليل الأشياء. نسيت أ وصفهالكم فهى متوسطة الطول, خمرية البشره, تخينه شويه, حادة الصوت وخاصة لما تتنرفز صوتها يجيب ا لتايه. تجيد ضربات الرأس وعند المعارك تجدها كا لأسد المفترس ولما تكون الخناقه مع حد من الحاره ومتلحقش تنزل من شقتها تجامل من بلكونتها بجردلين ميه على المعتدين . وقت الشده بألف راجل, ياما حلت مشاكل وياما عملت مشاكل, غضبها سريع وأرضائها أسرع, اللى فى قلبها على لسانها, تقول ا لحق ولو حتى على رقبتها, ذ كيه ذكاء فطرى يعنى تفهمها وهى طايره. أما أنا فأسمى صابر راجل عقلانى وهيه عاطفيه أ نا متأنى وهى مندفعه, أنا برتب كلامى وهى كلامها بيطلع طبق الأصل زى حا لتها وهى بتتكلم, زعلانه يبقى الكلام زفت, فرحانه يبقى زى العسل, الخلاصه ما يعجبهاش الحال العوج وعلى هذا أيها ا لساده القراء الأعزاء تلك مقدمه بسيطه عنى وعن الست نبويه رويتر وسأبدأ إن شاء الله فى نشر مغامراتى اليوميه معها وأ تمنى أن تحوز رضاكم وتحظى بتعليقا تكم وردودكم.
مع شكرى وأطيب تمنياتى

شادى

الحلقه 1

همه حضروا أمتى

طرق على الباب.. طرق على الباب متواصل قمت متثاقل شاخطا طيب .. طيب.. شوية صبر يا ناس .. فتحت الباب ووجهى عابس فإذا الست نبويه على الباب تصبحنى بكلامها.. بسم الله الرحمن الرحيم, هم حضروا أمتى على وشك يا صابر وشك مقلوب كده ليه ع الصبح يا راجل, ده حتى يخلى اليوم شؤم. قلت لها وأنا اتثائب خشى يا نبويه صباح الخير.. دخلت وبقها مبطلش كلام, وحييجى منين الخير مادمت أنت مبوز كده, جلست على الكرسى تتفرس فى وشى تحاول معرفة سبب زعلى وفجأه صرخت أيه الحكايه يا استاذ أنا واقفه ساعه فى طابور العيش ونص ساعه على ما جبتلك الفلافل والفول قلت أفطرك, تقابلنى بسحنتك المقلوبه دى.. سحبت ناعم شويه ورققت صوتى شويه وقلتلها تسلم أيديكى يا ست نبويه يا حنينه, ربنا ما يحرمنا منك وقمت بأعداد الفطار ووضعته على الترابيزه المهكعه القايله للسقوط وقلتلها بسم الله .. يا الله بقى.. قومى.. هو الفطار يحلى من غيرك يا جميل.. هزت رقبتها يمين وشمال قائله عجايب اسمع كلامك أصدقك اشوف عمايلك استعجب. جلسنا نفطر وانا ادعوا الله فى سرى أن نفطر فى هدوء شويه وألا تبدا فى سرد موجز أنباء الحى ولكن هيهات هيهات يا أخوانا راديو بايظ وانفتح وزراير قفله ضاعت , بدات بأخبار الحلاقين والخضريه والعربجيه ويا عينى على بنت أم خضره اللى ولدت بصعوبه بمستشفى الحضره, وأبوسيد اللى رمى اليمين التانى على مراته.. أى والله راجل, أصل الوليه دى تخاف ما تختشيش لسانها زفر وما بيطمرش فيها العيش والملح ..على سيرة العيش والملح يا خويا تصدق إن عبده البقال الهى ما يوعى ولا يكسب خلى كيس الملح بأ تنين جنيه,قال ايه ملح مستورد.. فاكرنا مختومين على قفانا, الا بمناسبة الختم يا سى صابر بيقولوا اللحمه لازم تكون مختومه من المدبح والقانون بيقول كده.. يعنى نموت يا خويا على المدبح ما يدينا الختم . بمناسبة الموت يا خويا أمبارح سيد أبوسند أبو مرات جوده السمسار مات, تصدق مات عنده تسعين سنه .. رفعت أيدها للسما .. وحياتك يارب تعيشنا قد ما عاش يارب, قال وأيه جنازته كانت هايله ومليانه ناس كتير, بصراحه الراجل يستاهل كان راجل طيب.. أنت عارف عم طيب الحلوانى جاله حفيد والراجل كان حيتجنن من الفرحه بس البخل لسه معشش فيه, أحنا قلنا حيوزع ع الحاره حلويات ولا حاجه , ربنا يا خويا يكفينا شرالبخل والبخله. صرخت بأعلى صوتى بس كفايه ياوليه أنتى بالعه راديو.. راحه شويه.. راحه وبعد كده كملى, كوليلك لقمه ترمى بيها عضمك, بقالك ربع ساعه مخدتيش فيها نفس, أرحمى نفسك. نظرت إلى بغضب ورفعت يديها للسما قائله الهى لايرحمك لادنيا ولا أخره يا بعيد, هى دى غلطتى يا راجل إنى بوعيك تبقى ماشى فى الحاره عارف كل حاجه عنها, صحيح أنت ما يطمرش فيك الخير أبدا, ومن نبى النبى نبى إن ما أتعدلت معايا يا صابر لأخلى يومك أسود من قرون الخروب. أرتعشت لقمة الفول فى أيديه ونظرت اليها فوجدت الشرر يتطاير من عينيها.. قلت لنفسى لابدإنى زودتها شويه, قمت من على الكرسى بحركه سريعه ودون ان أنظر اليها سأ لتها تشربى شاى؟ محاولا تهدئة الموقف. رفعت أحدى حاجبيها وقالت بقرف لاشاربه ولا طفحه بعد ما سممت جتتى بكلامك اللى يغم. قلت لها بصوت حنين يا وليه أعذرينى أنا من أمبارح ما نمتش( وكنت كاذبا فى هذا فقد نمت زى القتيل نوم عميق) وأعصابى تعبانه شويه.. لم ترحمنى ردت مستهزئه أيه خسرت فلوسك فى سباق الخيل ولا مصنعك فلس , على أيه يا حبة عينى أعصابك تتعب لاأنت وزير ولا صاحب أملاك.. حوش يا واد العربيه اللى قدام البيت والشقه الملك اللى على النيل , ده كل اللى تملكه هدومك وشوية الكتب اللى بتتسقف فيهم.أستفزنى كلامها فرديت بعصبيه كفايه ياوليه.. ما الحال من بعضه.. وفجأه ضحكت ضحكه مستفزه قائله طب هات القميص اللى انت لابسه أخيطلك الزرار اللى طار منه وانت بتتشنج وتتنطط وبتعملى عجين الفلاحه, يادى النيله على رجالة الزمن ده. قلتلها بصوت عالى مش قالع وملكيش دعوه بيه وشوحت بأيدى وضربت بأيدى على الترابيزه فانقلب صحن الفول على نبويه ودى كانت غلطة عمرى فلقد تحولت نبويه ألى أسد غاضب فقامت كالوحش وقذفتنى با لطبق الثانى ولكن لستر ربنا لم يصيبنى, وجريت زى المجنون على باب الشقه وطرت على السلا لم وهى واقفه على درابزين السلم تشتم وتدعى .. ودينى ما أنا سايباك , يا أنا يا انت , إن ما خلينك تمشى تبص وراك ما بقاش انا نبويه. وأنا من تحت أشاورلها بأيدى وأستفزها انتى ولا تقدرى تعملى حاجه فاهمه ولا تقدرى تعملى حاجه ثم انطلقت إلى قهوة مرعى وقلبى يدق دقات سريعه وعقلى يفكر ويخطط كيف سأ دخل إلى شقتى فى أمان دون أن ترانى نبويه وفيما ينتظرنى من مغامرات أخرى مع نبويه.

وإلى لقاء أخر فى مغامرات أخرى

شادى