فضيحة وولفويتز .. وفضائح النظام الحاكم في مصر

أحمد يونس · 18-08-2007, 10:21 pm

فضيحة وولفويتز .. وفضائح النظام الحاكم في مصر

سألني أحد أصدقائي ... إيه الضجة الكبيرة قوي دي اللي كانت حاصلة في البنك الدولي .
أجبته : لقد ارتكب رئيس البنك الدولي فضيحة كبيرة قوي .
صاحبي : .. فضيحة كبيرى قوي .. يا خبر أبيض ... هو عمل إيه
أنا : السكرتيرة بتاعته يا عم
صاحبي : ... آه قول كده بقى .. هي فيها سكرتيرة .. وبعدين مش الكلام ده بره عادي
أنا : لأ ياعم دماغك ما تروحشي لبعيد
صاحبي : أمّال فيه إيه قول لي
أنا : السكرتيرة بتاعته رفع الراتب بتاعها بما يخالف اللوائح المعمول بها
صاحبي : ودي تبقى فضيحة عندهم ,,,,,,,!!؟؟
أنا : آي طبعاً
صاحبي : أمّال اللي بيحصل عندنا في مصر ده نسمية إيه
أنا : مش فاهم حاجة .
صاحبي .. لما الراجل هناك يرقي السكرتيرة ويزود مرتبها يبقى فضيحة ... أمّال الحاجات اللي بتحصل في مصر دي نسميها إيه
أنا : حاجات إيه يا عم أنا مش فاهم حاجة ... هو فيه حاجات زي كده بتحصل في مصر
صاحبي : يوووووووووووووووووووه كثيييييييييييييير ... أنت مش عايش في الدنيا يابني واللا إيه .
أنا : مش واخد بالي
صاحبي : أنت مش فاكر موضوع يوسف والي ويوسف عبد الرحمن وراندا الشامي ........ .
أنا : إيه الأسامي دي ياعم .. أنا مش عارف حد من دول خالص .
صاحبي : إنت باين عليك غلبان ومش متابع
أنا : معلهشي أصل أنا ما بتفرجشي على نشرة 9 اللي على القناة الأولى .
صاحبي : بس الحاجات دي ما جاتشي على نشرة 9 .. ما علينا .. هاحكيلك وأمري لله .
أنا : ياللا يا عم احكي انت شوقتني على الآخر.
صاحبي : يوسف والي ده يا سيدي كان وزير زراعة قعد فترة كبيرة قوي أكثر من 20 سنة وزير زراعة ...
أنا : يا خبر أبيض
صاحبي : باأقولك إيه ما تقاطعنيش
أنا : حاضر أنا آسف .. كمل
صاحبي : وزير الزراعة ده اتعرف على واحد اسمه يوسف عبد الرحمن كان موظف عادي خالص زي السكرتيرة اللي بتقول عليها دي بتاع البنك الدولي
أنا : وبعدين
صاحبي : وبعدين قعد يرقيه ويزود مرتبه ، يرقيه ويزود مرتبه ، يرقيه ويزود مرتبه ، يرقيه ويزود مرتبه
أنا : إيه يا عم حيلك حيلك .. إيه دا كله
صاحبي : أنت لسة شوفت حاجة
أنا . هو فيه حاجات أكثر من كده
صاحبي : حاجااااااااااااااااااااااات كثيييييييييييييييييييييييييير
أنا : طب كمل يا أخويا
صاحبي : يرقيه ويرفع مرتبه ، يرقيه ويرفع مرتبه ، يرقيه ويرفع مرتبه ... لحد ما خلاه يمسك حوالي 15 أو 20 منصب مرة واحدة ..
أنا : 20 منصب
صاحبي : هي دي حاجة أمّال لما تعرف إن مرتبه كان بيعدي مئات الألوف من الجنيهات ..
أنا : الوزير
صاحبي : وزير إيه يا عم .. الوزير بيلعب في الملايين .. مئات الألوف دي تبع يوسف عبد الرحمن
أنا : طب مئات الألوف دي في السنة
صاحبي : سنة إيه يا عم .. مش باأقولك انت غلبان ...
أنا : غلبان .. ليه
صاحبي : يا عم المبلغ ده في الشهر
أنا : يا خبر أبيض
صاحبي : أكمل واللا ها تقاطعني تاني
أنا : لأ ياعم خلاص .. كمل .
صاحبي : لو قاطعتني تاني أنا مش ها أكمل .
أنا : خلاص أنا آسف .. كمل بقى .
صاحبي : أما راندا الشامي دي بقى .. فدي فاكهة الوزارة .. الوزير برده رقاها وزود مرتبها ، رقاها وزود مرتبها ، رقاها وزود مرتبها ، وياريتها استكفت بالمرتب بتاعها اللي كان بيعدي عشرات الألوف .. وللأسف بدأت في الطريق الحرام .
أنا : الحرام .......... يا خبر اسووووووووووووووووووووو.................
صاحبي : لأ يا عم .. دماغك ما تروحشي لبعيد .. وبعدين أنا قلت لك ما تقاطعنيش .
أنا : أمال إنت عاوز دماغي تروح فين
صاحبي : الحرام اللي أنا قاصدي عليه .. هو الرشوة .. بدأت تاخد رشاوي من كل اللي ليهم صلة بالوزارة .. شركات ، هيئات ، رجال أعمال ، ورشوة قليلة تسهل مصالح كثيرررررررررررررررة غير كده الثلاثة مع بعض يوسف ويوسف وراندا سهلوا دخول مبيدات حشرية ومخصبات زراعية مسرطنة غير مصرح بيها قانونا في أي حتة في العامل .. إلا مصر طبعاً ................!!
أنا : يا خبر أبيض ... طب والناس دول اتعمل فيهم إيه .
صاحبي : ولا حاجة .. وبعدين أنا مش قلت لك ما تقاطعنيش
أنا : يا عم ما دي حاجة تخلي الواحد يتجنن ويخرج عن شعوره
صاحبي : دي آخر مرة تقاطعني فيها .. ولو قاطعتني بعد كده مش ها أكمل بقيت الحاجات
أنا : خلاص يا عم أنا آسف .. كمل بقى
صاحبي : الوزير يا عم ما حدش قدر يهوب ليه .. أما يوسف بيه عبد الرحمن ورندا هانم الشامي .. فدول بقى ليهم قواضي كثيرة شغالة .. بس شكلها كده الموضوع كله هايطبخ ويطلعوا من القضايا دي زي الشعرة من العجينة
أنا : إزاي .. دا يبقى ظلم كبير .. يعني رئيس البنك الدولي يتفضح عشان رقى السكرتيرة وزود مرتبها مرة واحدة .. ودول يعملوا البلاوي دي كلها وما يحصلشي ليهم حاجة .
صاحبي : مش بقول ليك إنك غلباوي وحذرتك قبل كده إنك لو قاطعتني مش ها أكمل كلامي .. وآدي انت أهو ما سمعتش كلامي ... وأنا كده زعلاااااااااااان منك قوي ويؤسفني أقول لك مش هاكمل كلامي .
أنا : يا عم لا يؤسفك ولا ما يؤسفكشي .. إنت كده خلصت كلامك أصلا .. معقولة فيه كلام ثاني عاوز تقوله أو فيه فضايح تانية ها تتكلم عليها ..
صاحبي : بقى كده .. خلاص أنا كنت ناوي أقول لك فضايح أماني أبو خزيم كبيرة مذيعات التلفزيون المصري مع رئيس جهاز مدينة 6 أكتوبر ، وكمان فضيحة المذيعة هويدا فتحي مذيعة القناة الثانية اللي كنت فاكرها غلبانة طلعت لا غلبانة ولا حاجة ، وكمان الكلام الكبير الكثييييييييييييير اللي بيتقال على وزير الإسكان السابق محمد إبراهيم سليمان .. وغيرهم وغيرهم كثييييييييييييييييير
أنا : يا خبر أبيض .. عشان خاطري لازم تكمل
صاحبي : أكمل إيه يا عم سيبني دلوقتي أنا عاوز أناااااااااااااااااااااااااااام
أنا : طب وها تكمل امتى
صاحبي : لما فضيحة ثانية تحصل في العالم الخارجي وتبلغني بيها .. أقوم أحكيلك علن الفضيحة المشابهه ليها في العالم الداخلي .
أنا : إيه العالم الداخلي ده
صاحبي : وكمان مش عارف العالم الداخلي كمان .. مصر يا عم أم الدنيا هي العالم الداخلي اللي قاصدي عليه .. روح نااااااااااااااااااااام بقى

ahalmasry · 21-08-2007, 02:48 am

أحب ان أنبه حضرتك إلى أن المنتدى اسمه مصر المحروسة و ليس مصر المسروقة أو المنهوبة .

شيرين · 21-08-2007, 11:56 pm

الى الأخ الكريم:
بعد التحيه
ليه بنحب نكتب على الأخطاء فقط ونحب تكرارهها فى كل مكان وننظر الى الجزء الفارغ من الكوب .
ليه منتكلمش على الشرفاء البيحبوا مصر و بيخافوا عليها و بيعملو على مصلحتها ليه بنحب الجانب الأسود ولانحب الجانب الأبيض.
فأنا لا أنكر ان فى بلدنا العديد من السلبييات و لكن ليست مصر وحدها فالدول العربيه المجاوره فيها تجاوزات كثيره نهب أموال بالهبل.
و يا أخى العزيز ليس بالنقد وحد يصلح حال الدوله و أريد أن أعطيك مثلأ:
فلو كان لديك ابن شقى ومشاغب ولايسمع كلامك فهل أصلاحه فى الوقت الحاضر ينفع بالنقد والضرب لا طبعا لانه سيؤدى الي العند اما لو صادقته وو قفت بجواره بالهدء فسوف يتغير ءان شاء الله.
فيجب علينا نحن الشباب أن ننظر الى الجزء الممتلئ من الكوب لكى نستطيع على العيش و بناء مستقبل أفضل لنا
و الرجاء منك فى المره القادمه أن تعطى مثلا جيدا لكى يليق بمصر المحروسه.

و السلام عليكم ورحمة الله و بركاته

أحمد يونس · 23-08-2007, 03:44 pm

اقتباس:

المشاركة الأصلية كتبت بواسطة ahalmasry [عزيزي الزائر يتوجب عليك التسجيل للمشاهدة الرابط للتسجيل اضغط هنا]

أحب ان أنبه حضرتك إلى أن المنتدى اسمه مصر المحروسة و ليس مصر المسروقة أو المنهوبة .

شكراً جزيلاً على التوضيح

أحمد يونس · 23-08-2007, 03:46 pm

اقتباس:

المشاركة الأصلية كتبت بواسطة شيرين [عزيزي الزائر يتوجب عليك التسجيل للمشاهدة الرابط للتسجيل اضغط هنا]

الى الأخ الكريم:
بعد التحيه
ليه بنحب نكتب على الأخطاء فقط ونحب تكرارهها فى كل مكان وننظر الى الجزء الفارغ من الكوب .
ليه منتكلمش على الشرفاء البيحبوا مصر و بيخافوا عليها و بيعملو على مصلحتها ليه بنحب الجانب الأسود ولانحب الجانب الأبيض.
فأنا لا أنكر ان فى بلدنا العديد من السلبييات و لكن ليست مصر وحدها فالدول العربيه المجاوره فيها تجاوزات كثيره نهب أموال بالهبل.
و يا أخى العزيز ليس بالنقد وحد يصلح حال الدوله و أريد أن أعطيك مثلأ:
فلو كان لديك ابن شقى ومشاغب ولايسمع كلامك فهل أصلاحه فى الوقت الحاضر ينفع بالنقد والضرب لا طبعا لانه سيؤدى الي العند اما لو صادقته وو قفت بجواره بالهدء فسوف يتغير ءان شاء الله.
فيجب علينا نحن الشباب أن ننظر الى الجزء الممتلئ من الكوب لكى نستطيع على العيش و بناء مستقبل أفضل لنا
و الرجاء منك فى المره القادمه أن تعطى مثلا جيدا لكى يليق بمصر المحروسه.

و السلام عليكم ورحمة الله و بركاته

حاضر

almasry · 26-08-2007, 01:31 pm

شيئ عجيب

أحمد يونس · 26-08-2007, 10:08 pm

اقتباس:

المشاركة الأصلية كتبت بواسطة almasry [عزيزي الزائر يتوجب عليك التسجيل للمشاهدة الرابط للتسجيل اضغط هنا]

شيئ عجيب

لا عجيب ولاحاجة يا عم ...
هي دي مصر ...............